Etxebizitza bat erostea ez dago beti pertsona guztien esku, ezta babespeko etxebizitza bada ere. Pertsona bakoitzak norbere baldintzak ditu, bai maila ekonomikokoak bai beste motatakoak, eta horiek kontuan izan behar dira. Hala ere, pertsona guztiek etxebizitza baten bizitzeko eskubidea daukate, hau da, euren bizitza-proiektua egin ahal izateko leku bat izateko eskubidea daukate. Eta, hain zuzen ere, horixe da Alokabideren helburua: gizarte-alokairuaren bidez, benetako alternatiba, erabat eskuragarria eta kalitatezkoa eskaintzea.

Eusko Jaurlaritzak alokairuko etxebizitzak sustatzeko apustu finkoa egin du, batez ere gizarte-laguntzako etxebizitzak; eta marko horretan dago kokatuta Alokabide eratzea. Horrela, berehalako eskaerari erantzuteaz gain, sustapen publikoko etxebizitzen parkean errotazioa bultzatzen dugu eta, etxebizitza erabilgarria den bitartean, pertsona gehiagok erabiltzea lortzen dugu.

Ikusmolde teorikoak eta aldez aurretiko ideiak alde batera utzita, alokairuko etxebizitzek, bertan bizi diren pertsonentzat, jabetzako etxebizitza baten funtzio berdinak betetzen dituzte. Alokabideri esker, alokairu erabat eskuragarria eta kalitate-berme guztiak dituzten etxebizitzetan bizi ahal da, etxebizitza gehienak Visesaren sustapenetatik datozelako.

Alokabide enpresa gaztea da, baina aditua. Gaur egun, Eusko Jaurlaritzaren sozietate honek alokairu babestuko 8.000 bat etxebizitza kudeatzen ditu, eta, hurrengo urteetan, Euskadiko parke osoa kudeatuko du. Alokabideren kudeaketari esker, alokairuen kudeaketa arintzen da eta, tratu pertsonal eta hurbil baten bidez, pertsonei euren etxebizitzarekin zerikusia duten izapideak errazten zaizkie.